1 نتيجة بحث عن صباح_الخير

#أخبار_عالريق
يكتبها/سعيد الطويل
■العدد اللي وصل غزة من المسافرين حتى الآن 250واحد ولسة مرت أبو عصام مش معاهم.
■تعون الصحة اللي بغزة بيقولوا اللي وصلنا مصاري ناشف من رام الله مليون دولار و21 ألف بس.
■الصحة اللي بغزة بتقول انه بدها 40 مليون دولار بالسنة عشان تغطي الحاجات الازمة عنا.
■فش ولا حالة كورونا جديدة بغزة .
■مسكت بلدية رفح مبارح 100كيلو بندورة خربانة وشوالات بزيلا كانوا بدهم يخزنوها بالفريزر .
■هلحين في عنا بغزة 492 محجور في حوالي 13 مركز وكلهم كويسين وبخير.
■شب جدع ومؤدب اسمه سامي برهوم مبارح انفجر فيه جسم مشبوه وهو قاعد بينقل من دارهم وتوفى عالمطرح..الله يرحمه.
■مبارح صارت اشتباكات بمصر بين الجيش وارهابين وقتلوا فيها ضابط .
■اليوم بدهم يفتحوا هايبر مول بالنصيرات والمنافسة مولعة بينه وبين سوبر ماركت أبو دلال بالأسعار.
■أكثر دولة عربية فيها كورونا هي السعودية فيها تقريبا 5300حالة.
■ترامب المجنون وقف دعم منظمة الصحة العالمية بالمصاري وبيقول عنهم فش عندهم دين.
■في 16 اصابة جديدة بفلسطين وصار العدد كله عنا 330.
■بخصوص ال 100$ تبعت العمال رابط الفحص اللي نزل هو بس ل3000 اسم ،والأسبوع الجاي فيه ل7000 جداد.
■اليوم حيكون القمر وكواكب زحل والمريخ والمشتري في "صف واحد" ،معقول قرب النيزك .
■سعر الجاج مبارح كان غلط قلي عنه رضوان ابن خالتي ،والسعر الصح بتسعة شيكل ونص الكيلو.
■بالأردن طلعوا قرار رسمي انهم مش حيصلوا التراويح بالجوامع .
■النيابة العامة أخذت حكم جديد من محكمة العدل العليا انها تلغي قرار فتح محطة المشهرواي تبعت الغاز اللي بالنصيرات وتسكرها ثاني.
■الخضرة يخوي اليوم بالسوق سعرها طري والبضاعة نظيفة .
■أربع علب بريل بعشرة شيكل بس بعرفش وين مصنوع .
■المخللات هذه السنة مش حاسيين فيها ريحة رمضان.
■نص دستة شباحات محير بخمسة شيكل .
■الكابوكي زمان مختفي من البلد شو قصته مش عارف .

#صباح_الخير للناس اللي صحيت الفجر تصلي وتذكر الله وتشكره وتدعي للناس اللي بتحبها بالسجدة الأخيرة من صلاتها.
-صباح الخير لأبو مراد الراجل النوارة اللي اشتاق للصلاة عالكرسي بأول سطر بالجامع .
-صباح الخير للشيخ نائل اللي صوته بيبسطنا بالآذان وبيوجعنا لما يقول صلوا في بيوتكم مع انه كنا مقصرين من أول.
-صباح الخير لأم عدنان الست التربانية اللي صحيت من النوم تولع النار عالطابون لتعمل أزكى خبزات مع صحن الزيت والزعتر.
-صباح الخير للأسي.ر الي من دار أبو عقل اللي روح من الحجر بسلام مبارح بعد ما قضى عن اليهود 13سنة وبالحجر 21يوم.
-صباح الخير لكل واحد طلع اسمه بشيك الشؤون ويارب كمان يطلعلك برابط مكتب العمل .
-صباح الخير للناس اللي صحيت متأملة خير انه هالغمة تزول والحال يتعدل والوضع يتغير والمحلات ترجع تفتح والمطاعم تشتغل والجوامع تتعمر والتروايح تصير زحمة والسرايا يضوي رمزونها ع طول، وشارع الرشيد يضل للفجر شغال وبسطات الغلابا تترزق والدكاكين تسكر عالسحور.
قولوا #يارب وهينا بدرنا النشرة عشان نمهد لرمضان ..
و #يسعد_صباحكم